Ким-чиде піскен балық

Корей тағамдарын сағынған кезде кей күндері осындай тағамдарды пісіреміз. Оңай, әрі өте дәмді.
Ким-чи
балық

Ким-чиді (грамдап ешқашан өлшемеппін. көз мөлшерімен шамалап 1үлкен кесе алам) қазанға салып 1 минуттай қуырып аламын. Балықтарды ким-чидің үстіне қойып, қазанның қақпағын жауып, отты ең төменгі дәрежеге басамын. Балығымыз піскенше шамамен 1 сағаттай отта қалдырасыз. Байқағаныңыздай не май, не тұз, не суда қоспайсыз. Ким-чидің шырынында балық піседі. Әзір болған балық та, піскен ким-чи де өте дәмді болады.

Кей күндері жұмыртқада қуырылған тубу да даярлаймын. 2 жұмыртқаны жақсылап миксерлеп, 0,5 шәй қасығы тұз салып, тубуны жұмыртқаға батырып, қазандағы майға қуырып аласыз. 

Advertisements

Мұхит жағасындағы барбекью

Мұхит пен үйіміздің арасы 10 минуттай ғана қашықтықта. Кей күндері мұхит жағасына барып барбекью жасап, шашлык пісіріп, салқын самалдың астында толқындармен арпалысқан серфингистерді қызықтап, күннің қызарып батқанын тамашалап отырып тамақ ішкенді жақсы көреміз.

Картопты нан

Тойымды, дәмді таңғы ас.
3 Картошка
1 Жұмыртқа
1-2 ас қасық май
тұз, қара бұрыш.
4-5 тілім нан
Үккіштен өткізілген картошкаға жұмыртқаны, тұзды, қара бұрышты араластырасыз. Енді нанның бетіне картошкадан қойып, табадағы қыздырылған майға нандарымызды картошка салынған бетімен қойып жай отта пісіреміз. Табаның қақпағын жауып қоясыз. Картошкалар пісті-ау дегенде 5-7 минуттан кейін келесі бетіне аударамыз. Нандардың асты қызарған соң табадан түсіресіз.

Балық таяқшалары

Кішкентай балалар ұнатып жейтін тағам екендігіне сенімім мол.

Балық еті (сүйексіз)
жұмыртқа
ұн
тұз, қара бұрыш.
нан ұнтағы
ірімшік (сыр)
сұйық май

Балық етін ұзындау таяқша ретінде турап алыңыз.
Ұнға тұз, қара бұрыш (қалауыңыз бойынша басқа да дәмдеуіштерді, ұсақтап туралған көк шөптерді  қосуыңызға болады) араластырыңыз.
Нан ұнтағына майда үккіштен өткізілген ірімшіктерді араластырыңыз.
Енді балықтарды әуелі ұнға, екінші, жұмыртқаға, үшінші, нан ұнтағына аунатыңыз. Енді қыздырылған майға салып қуырыңыз. (Мен фритюрницада пісіремін. Дайын болғанда пешім өзі ескертеді) Арнайы пешіңіз болмаса қазанда-ақ әзірлеуге болады, сырты қызарғанға дейін қуырасыз.

Бал арасы торты

Қызымның екі жасқа толған туған күніне арнап пісірген тортым. Кәдімгі медовый торты. Медовый торт рецептерінің ішіндегі ең дәмдісі десем болады. Себебі бірнеше медовый тортын пісіргенмін, солардың ішінде ерекше ұнағаны осы болды. Енді медовый тортын пісіргенде үнемі қолданатын рецептім болады инш.

500 гр. ұн

2 жұмыртқа

200 гр. шекер

80 гр. сары май

115 гр. бал (3 ас қасық шамамен)

2 шәй қасығы ас содасы

крем үшін:

400 гр. Қаймақ

150 гр. қою сүт  (сливки 33%)

1 қоюлатылған тәтті сүт (сгущенка)

2 ас қасық бал

ара үшін:

қара шоколад

ақ шоколад

өрік дәнегі

Бисквиттерді пісіру үшін әуелі жұмыртқа мен шекерді жақсылап миксерлейміз. Сосын осы қоспаға бал, сары май және соданы қосып, осы ыдысымызды буға қоямыз. (Яғни қазандағы қайнап тұрған судың үстіне бисквитті әзірлеп жатқан ыдысыңызды қоясыз). Үнемі қозғап отыруыңыз қажет, қоңырқай түске айналып, өнім екі есеге ұлғайғанда ыдысыңызды оттан түсіресіз. Енді ұнды қосып, қамыр әзірлейсіз. Қамырдың бетін жауып қойыңыз. 10-15 минуттан соң қамырыңызды 3 бөлікке бөліп, бисквиттерді 200С-де пісіресіз. Өте жылдам піседі, абай болыңыз. Әр бисквит 5-7 минутта дайын болады.  Дайын болған бисквиттерді шеңбер ретінде формаға келтіріп, калған қамырды үгітіп алып қойыңыз торттың шетіне себесіз.
Крем үшін жоғарыдағы заттарды араластырып, жақсылап миксерлеп, біраз уақытқа тоңазытқышқа қойыңыз.
Торттың араларына, бетіне креміңізді жағып, қалауыңыз бойынша сәндеңіз.
Мен бисквиттың үгітінділерін шеттеріне сеуіп, бетіне шоколад пен өрік дәнінен аралар жасадым. Араларды көргенде қызымның қуанышында шек болмады. Бірінші аралардың қанаттарын теріп жеп алды. 🙂 Жаңғақ, өрік дәндерін қатты жақсы көреміз.
Сіздерде осындай торттардан жасап беріп кішкентайларыңызды қуантыңыздар.

Дәмді салат

Тоңазытқышымнан табылған көкеністерден жасалған салат. Өте дәмді шықты. 

2 тал Картошка
2 алма
2 сәбіз
1 қызылша
2 жұмыртқа
0,5ст. жаңғақ
1 анар
майонез

Картошка мен сәбізді, қызылшаны, жұмыртқаны алдын-ала қайнатып аламыз. Жаңғақ пен жұмыртқадан басқасының бәрін үккіштен өткіземіз. Жұмыртқаны қолмен турағаныңыз жөн. Жаңғақтарды үгітіп алыңыз. Барлығының арасына майонез жаға отырып кезекпен қойып шығыңыз, ең үстіне анардың дәнегін себіңіз. Әрі жылдам, әрі дәмді салатымыз дайын.

Торт «Птичье молоко»

Бала күнімізде талай жеген, мен үшін ең дәмді торттардың бірі.
Осы тортты көптен бері пісіруді ойлап жүрген едім, бірақ ішіне желатин қосылатын болғандықтан, желатинді немен алмастырудың жолын іздеумен болдым. Сөйтіп, бір күні оның да шешімі табылды, қуанышымда шек болмады 🙂
Желатинді жапондық кантен немесе агар-агармен алмастыруға болады. Бұларды көбінде жапон, қытай дүкендерінен табасыздар.  Агар-агар мен кантен су асты өсімдіктерінен жасалынады. Және агар-агардың желатин секілді ерекше иісі болмайды. Яғни тәтті тағамдарға қолданғанға өте жақсы.
Бірінші рет пісіргендіктен торттың түріне қарап сөкпеңіздер 🙂
Дәмі өте тамаша болды. Бала күнімізде жейтін птичье молоконың дәл өзі 😉

Continue reading «Торт «Птичье молоко»»